Сүүлийн жилүүдэд Улаанбаатар хотын хүн ам хурдацтайгаар өсч 2007 оны байдлаар 1,031,000 хүрч, хүн амын өсөлтийн хувь нь 1988 оноос 2007 оны хооронд 3.6% болсон байна. Одоогийн Улаанбаатар хотыг хөгжүүлэх мастер төлөвлөгөө нь 2002 онд батлагдсан боловч өнөөгийн хүн амын хөгжлийн хурд, хотжилт, гэр хорооллын өргөжин тэлэх явцыг гүйцэхгүй байгаа нь тодорхой. Ийнхүү нийслэлийн хотжилт, нийгэм эдийн засгийн хөгжлийн хурдтай уялдуулан зам харилцаа, дэд бүтцийг ч өөрчлөн өргөжүүлэх шаардлагатай болоод байна. Энэ зорилгоор ЖАЙКА-аас 2030 он хүртэлх хотын хөгжлийн ерөнхий төлөвлөгөөг дахин судалж, түүний хэрэгжилтийн чадавхийг сайжруулах хөгжлийн судалгааны төслийг хэрэгжүүлж байна.