Press Release

Durante tinan 20 resin, Japaun apoiu ona prosesu rekonstrusaun nasaun Timor-Leste iha aspeitu oin-oin hanesan harí infraestrutura, diversifikasaun industria no expansaun ba servisu soial sira. Aleinde ne'e, to'o ohin loron, kuaze Timor-oan rihun rua (2000) resin mak partisipa ona treinamentu no kursu iha Japaun, no hosi ema 2000 ne'e, nain 95 halao ona estudu iha universidade sira iha Japaun hodi hetan títulu akadémiku.

Iha Loron 27 fulan Agostu 2020, seremonia asina akordu projetu Dezemvolvimentu Rekursu Umanu ba dala-tolu ne'ebe finansiadu hosi Governu Japaun, halao iha Ministériu Negosiu Estranjeiru no Kooperasaun, iha Dili. Embaixadór Japaun ba Timor-Leste, S.E. Sr. KINEFUCHI Masami no Ministra Negosiu Estranjeiru no Kooperasaun Timor-Leste, S.E. Dra. Adaljiza Albertina Xavier Reis Magno, asina Troka de Nota ba Projetu ne'e. Iha seremonia ne'e, S.E. Dr. Adaljiza Albertina Xavier Reis Magno no Sr. GOTO Ko, Xefe Reprezentativu JICA Timor-Leste asina mos akordu Fundu Gratuita ba projetu JDS ne'e rasik.

Objetivu husi projetu JDS ne'e mak atu apoiu dezenvolvimentu rekursu humanu ba funsionariu públiku foin-sae sira iha Timor-Leste, ne'ebe ita hein katak sei halo formulasaun no implementasaun ba planu dezemvolvimentu sosial no ekonomia, ho esperansa atu sira bele sai mos lider iha futuru. Aleinde ne'e, projetu ne'e nia objetivu mak atu hametin liu taan relasaun parsería entre Timor-Leste no Japaun.

Embaixador Japaun ba Timor-Leste, S.E. Sr. KINEFUCHI iha ninia diskursu hateten, "Ha'u fiar programa ne'e sei sai oportunidade ne'ebe diak tebes ba líder foin-sae Timor-oan sira, la'os deit atu hetan matenek maibé mós atu halo ligasaun ho líder foin-sae sira husi nasaun Ázia ne'ebe mós estuda iha Japaun no harí lasu pessoais ho sira, ne'ebé sei sai nudar rikusoin boot la'os deit ba sira-nia an maibé ba país ne'e iha futuru."

Projetu bolsu estudu JDS hahú iha Timor-Leste hosi tinan 2018. Daudaun ne'e iha bolseiru nain 8 hosi etapa dahuluk nian maka estuda hela iha Japaun, no bolseiru ba etapa daruak hamutuk nain 8 mos sei hahú sira nia estudu iha fulan Setembru tinan ne'e. Liuhosi seremonia asina akordu ne'e, bolseiru nain 8 seluk sei selesiona no hahú sira nia estudu komesa tinan oin. Bolseiru sira sei halao kursu mestradu nian iha area hanesan: Melloramentu Administrasaun Públiku no Sistema Legal; Mellorametu Prestasaun Servisu; Dezenvolvimentu Rural no Industria; Melloramentu ba Transportasaun/Urbana no mos Dezenvolimentu Ambiental nian.