2018-03-09
Agrikultór 42 iha Buluto ne'ebé partisipa iha Projetu nia Plot Komparasaun iha époka ne'e hahú uza landak iha sira nia natar. Jeralmente, sira hotu haksolok atu uza landak no fó obrigadu ba Projetu tanba introduz ekipamentu ne'e hodi ajuda hakmaan sira nia serbisu hamoos du'ut iha natar. Agora dadaun iha área Buluto Projetu introduz ona landak ba agrikultór hamutuk 12 husi agrikultór 42 ne'ebé sai nu'udar Projetu nia alvu.
Sr. Jacinto Sebastião Viegas (50), agrikultór husi suco Lifau hatete katak depoiz kuda tiha hare semana rua kuaze laiha du'ut iha nia natar laran tanba nia kontrola bee ho diak tuir instrusaun husi Projetu nia Pessoál Monitoriamentu sira. Maski nune'e, nia gosta nafatin atu uza landak iha nia Plot Komparasaun tanba nia hatene katak landak bele ajuda hamamar rai no halo hare bo'ot lalais. Uluk, Sr. Jacinto uza tempu naruk serbisu hamoos du'ut iha nia natar, maibe hafoin observa rasik efetividade husi Landak, nia fiar katak iha futuru ekipamentu ne'e bele ajuda nia hamenus oras serbisu hamoos du'ut iha nia natar.
Sr. Noriyoshi Odashima, Japaun nia Péritu ba Tékniku Kultivasaun louva agrikultór sira ne'ebé tuir instrusaun husi Projetu no implementa duni tékniku sira iha sira nia natar. Sr. Odashima hatete katak, atu muda agrikultór sira nia prátika tuan laos buat ne'ebé fasíl, maibe bainhira agrikultór sira observa rasik benefisiu husi tékniku kultivasaun sira ne'e, nia fiar katak sira sei implementa duni iha futuru.
Projetu hein katak agrikultór ne'ebé uza ona landak iha sira nia natar bele ona observa rasik sira nia natar bainhira mak atu uza landak sein instrusaun husi Projetu nia Pessoál Monitoriamentu.
Agrikultór husi Lifau uza Landak iha ninia natar
Agrikultór senti satisfas hafoin uza Landak iha nia natar
Área Plot Komparasaun ne’ebé introduz husi Projetu iha Laleia, Munisípiu Manatuto (1).
Área Plot Komparasaun ne’ebé introduz husi Projetu iha Laleia, Munisípiu Manatuto (2).