2018-07-02
Agrikultòr iha Vemasse hahù ona uza màkina baku hare ne'ebè fornese husi Projetu iha èpoka dahuluk tinan ne'e. Sira haksolok tebes uza màkina foun hodi baku sira nia hare depoiz kolleta. Maske agrikultór sira tenke hein ituan sira nia rotasaun atu uza màkina baku hare, tinan ne'e sira la presiza gasta tempu barak kompara ho tinan kotuk.
Sr. Cancio Damião da Costa (40), agrikultòr husi Vemasse Tasi hatete katak tanba nia èkipa agrikultòr hetan apoiu husi Projetu, agora nia bele baku nia hare hafoin kolleta. Tinan kotuk Sr. Cancio nia hare hetan estraga tanba rai kleur iha loro manas no udan hodi hein màkina baku hare.
Sr. Faustino Soares (48), agrikultòr seluk husi Vemasse Tasi hatete katak tinan kotuk nia tenke lao ba mai iha natar laran loron-loron kontrola màkina baku hare tanba nia tauk màkina ne'e bele uza fali husi agrikultòr seluk. Agora Sr. Faustino sai nu'udar membru èkipa agrikultòr tanba ne'e operadòr màkina sei mai rasik ba nia natar hodi baku hare. Nia hein atu faan nia hare ba ACELDA karik nia hetan rezultadu diak èpoka ne'e.
Agrikultòr sira hahù serbisu maka'as no mehi atu sosa rasik màkina baku hare iha futuru.
Agrikultòr sira iha Vemasse baku sira nia hare (1)
Agrikultòr sira iha Vemasse baku sira nia hare (2)
Agrikultòr leva nia nia hare ba fatin rontok
Fatin rontok
Agrikultòr enxe sira nia hare ba saka bo'ot hafoin rontok.