Project News

Asina kontratu ba daruak kona-ba faan foos rai entre Asosiasaun Agrikultór CAAKUB no Kompañia ACELDA ho restorante foun hitu realiza ona iha resintu MAP, Dili iha 4 Outubro 2018. Seremonia asina kontratu ne'e nu'udar kontinuasaun husi seremonia dahuluk ne'ebé halao ona iha fulan Maio liuba iha Embaixada Japaun, Dili.

Seremonia ne'e partisipa husi Ministru MAP foun, Sua Exe. Sr. Joaquim Jóse Gusmáo dos Reis Martins, Embaixadór Japaun Sua Exe. Sr. Hiroshi Minami, reprezentante JICA Sr. Masafumi Nagaishi, reprezentante husi munisípiu sira hanesan; Baucau, Bobonaro, Manatuto no reprezentante restorante sira. Aliende ne'e, paratisipa mós husi espoza Primeiru Ministru, Sra. Isabel Fereira ne'ebé mak sai nu'udar konsumidór regular husi CAAKUB.

Ministru MAP, Sr. Joaquim rekoñese katak fornesimentu foos rai ne'ebé iha dadaun ne'e seidauk bele responde ba nesesidadade rai-laran tanba ne'e, nia kompremetidu tebes atu serbisu maka'as durante ninia mandatu atu hasa'e tan produsaun foos rai. Nia louva JICA nia komprimisiu atu hasa'e agrikultór sira nia rendimentu uma-kain liuhusi haforsa produsaun foos rai no husu ba MAP no agrikultór sira atu serbisu maka'as liutan hodi asegura soverania ai-han iha nasaun ne'e. Sr. Ministru agradese ba restorante sira atu promove foos rai no nia husu ba Timor-oan sira atu orgullu konsumu sira nia produtu lokál.

Embaixadór Japaun, Sr. Hiroshi Minami hatete katak Governu Japaun liuhusi JICA apoiu ona esforsu sira atu hasa'e produsaun foos rai iha Timor-Leste. Nia fiar katak hasa'e kuantidade no hadi'ak kualidade foos rai importante tebes. Tuir Sr. Embaixadór, faan foos rai tenke habelar liutan atu nune'e agrikultór barak liutan mak sei motivadu atu hasa'e sira nia produsaun.

Iha parte seluk, reprezentante husi restorante Sra. Threse (29) agradese ba Diresaun Nasionál Agro Komerisu no Projetu JICA tanba intraduz ona foos rai ba nia restorante. Nia hatete katak hahú husi agora nia sei uza foos rai iha nia restorante hodi bele ajuda promove foos rai no kontribui ba agrikultór lokál sira nia rendimentu. Nia husu ba CAAKUB no ACELDA atu kontinua nafatin fornese foos ne'ebé kualidade no fornese stok regular ba restorante sira hodi asegura sustentábilidade.

Agora hamutuk restorante 13 no ótel 2 mak serbi ona foos rai 100% husi CAAKUB no ACELDA ba sira nia konsumidór sira. Faan foos rai mós agora dadaun habelar tan ona ba munisípiu sira seluk hanesan Maliana. Liuhusi kolaborasaun entre MAP no Projetu JICA hein katak ba futuru atividade ne'ebé hanesan sei habelar liutan ba restorante sira seluk iha Timor Laran tomak.

Bainaka sira husi MAP, Embaixada Japaun, JICA TL no Sra. Isabel Fereira

Reprezentante sira husi restorante

Ministru MAP, Sr. Joaquim José Gusmão dos Reis Martins entrega logo foos rai ba Jestór Green Resto

Ambaixadór Hiroshi Minami entrega logo 100% uza foos rai ba jestór restorante sira.