Project News

Iha Primeiru époka tinan ne'e, Projetu kontinua haluan tan ninia atividade Plot Komparasaun iha Maliana I no hili tan agrikultór foun hamutuk 42. Liuhusi habelar tan atividade ne'e, Projetu laos hakarak deit atu hasa'e agrikultór sira nia koñesementu kona-ba tékniku kultivasaun maibe mós eduka sira atu tau-matan no maneja diak sira nia natar liu-liu kona-ba kontrola bee no du'ut.

Tuir observasaun hatudu katak agrikultór foun ne'ebé partisipa iha Projetu nia atividade intersante tebes ho efetividade husi Markadór Liña depoiz sira koko rasik instrumentu ne'e. Sira hatete katak, ekipamentu ida ne'e serbisu lalais liu hodi kuda liña kompara ho uza tali.

Sra. Ermelinda Baros (64) agrikultór foun husi suku Holsa haksolok tebes atu uza Markadór Liña ba dahuluk hodi marka ninia natar. Nia mós koko rasik efetividade husi instrumentu ne'e liuhusi destaka ema nain rua ba kada kabubu husi plot komparasaun, rezultadu prova katak traballadór ne'ebé destaka iha kabubu ne'ebé aplika kuda liña ramata serbisu lalais liu dúke traballadór ne'ebé destaka iha kabubu ne'ebé kuda babain. Depoiz koko rasik, Sra. Ermelinda nota kedas katak karik nia aplika kuda liña iha nia natar, nia sei hasai osan menus hodi freta ema atu kuda.

Sr. Manuel Pereira (40), agrikultòr ne'ebè natar besik ho Sra. Ermelinda voluntariamente husu atu partisipa iha Projetu nia Plot Komparasaun depoiz observa rasik efetividade husi Markadòr liña. Nia gosta tebes atu uza ekipamentu ne'e iha ninia natar. Nia hatete katak bainhira nia uza Markadòr liña iha nia natar nia sei kuda hare lalais liu no hasai osan menus hodi selu ema.

Sr. Nariyoshi Odashima, Japaun nia Pèritu ba Tèkniku kultivasaun hatete katak agora dadaun ne'e Projetu implementa ona ninia atividade ba agrikultòr 10 husi agrikultòr 42 ne'ebè mak sai nu'udar Projetu nia alvu iha èpoka primeiru, durante implementasaun husi Plot Komparasaun Projetu sei kontinua fornese asistènsia tèkniku ba agrikultòr sira kona-ba maneira saida mak tenke hala'o tuirmai liu-liu kona-ba kontrola bee no du'ut. Iha tempu ne'ebè hanesan, nia dehan katak Projetu sei kontinua serbisu hamutuk ho agrikultòr tuan sira hodi asegura katak sira aplika nafatin tèkniku sira ne'ebè hanorin husi Projetu iha sira nia natar no fahe esperensia ne'ebè sira hetan husi Projetu ho agrikultòr sira seluk iha fatin ne'ebà.

• Favór akompaña Projetu nia pajina Facebook

Projetu nia Pessoàl Monitoriamentu hanorin agrikultòr òinsa atu uza Markadòr liña

Agrikultòr husi suku Holsa ho konfia -aan uza Markadòr liña depoiz hanorin husi Projetu nia Pessoàl Monitoriamentu

Agrikultòr hala'o kuda liña depoiz sira nia natar marka uza Markadòr liña

Agrikultòr sira aplika kuda liña iha sira nia natar no agrikultòr seluk ne'ebè natar besik observa hela

Preparasaun rai iha Maliana I (1).

Preparasun rai iha Maliana I (2).