Project News

Sra. Ieko Kakuta nu'udar Profesór iha Fakuldade Relasaun Internasionál Unversidade Asia iha Japaun, nia mós nu'udar antropolojia ida. Nia estuda kona-ba Asosiasaun Uzu Bee (WUA) iha nasaun dezenvolvidu sira liu-liu nasaun Filipina. Primeiru vez nia rona kona-ba Timor-Leste (TL) iha 1991 bainhira akompaña iha TV kona-ba masakre Santa Cruz. Depoiz vizita rasik TL, nia hakfodak tebes ho sosiedade nia hakmatek maske nasaun ne'e nia ístoria pasadu nakonu ho problema. Nia mós inspira ho Timor-oan nia hahalok ne'ebé familiar no TL nia paizajen ne'ebé furak.

Durante Profesór Kakuta nia vizita foin lalais ne'e mai TL husi 10 to'o 21 Febreru ho misaun atu fórnese asisténsia tékniku ba Projetu. Profesór Kakuta vizita área projetu rua iha Buluto no Maliana hodi hasoru malu ho parte-intersada sira inklui autoridade MAF, xefi suco, exténsionista, gate keeper, prezidente WUA no pessoál husi FAO. Liuhusi enkontru ho sira professor Kakuta kompriende liutan kona-ba WUA no fórnese rekomendasaun ba Projetu hodi ajuda WUA dezenvolve nu'udar organizasaun ne'ebé efetivu iha TL ba futuru.

Profesór Kakuta hatete katak karik agrikultór iha Buluto no Maliana uza irigasaun ho masimu, iha tinan ida sira bele kuda ai-han dala rua, laos deit kuda hare maibe mós kuda modo-tahan no ai-han sira seluk tan. Nia hakarak agrikultór sira atu uza vantajen husi irigasaun atu hasa'e produsaun, enkuantu husu ba WUA atu bele hamrik mesak hodi asegura jestaun fasilidade irigasaun no distribuisaun bee ne'ebé justu ba agrikultór tomak.

Prof, Kakuta mós subliña katak ba WUA atu sai susesu iha futuru,agrikultór rasik mak tenki sai desizaun nain laos ema husi liur hanesan MAF no Projetu. Tanba ne'e nia husu ba Projetu atu fasilita WUA no respeitu nafatin sira nia lei ne'ebé eziste ona, husik pessoál husi WUA mak lidera rasik WUA.

Prof. Kakuta apresia esforsu nia Projetu atu kria merkadu ba agrikultór sira hodi faan foos atu hetan osan, bainhira merdadu ba foos rai dezenvolve iha futuru nia iha konfiansa katak agrikultór sira sei konvensidu liutan atu halo natar no aumenta sira nia produsaun. Nia observa katak agrikultór mós bele rezolve rasik sira nia problema, enkuantu husu ba projetu atu sai apoiantes ne'ebé diak hodi ajuda sira atinje sira nia objetivu no hamrik mesak.

Prof. Kakuta.

Prof. Kakuta no Sr. Niwa vizita Maliana I.

Prof. Kakuta vizita Projetu nia eskritóriu iha Maliana, Munisípiu Bobonaro.

Prof. Kakuta fó palestra ba ofisiais Projetu sira Estudu Kazu kona-ba Susesu Sistema Irigasaun iha Filipina.