Project News

Iha tinan kotuk Projetu halo promosaun foos rai iha governu nia institusaun sira hanesan Ministériu Agrikultura no Peskas (MAP) no Ministériu Saúde, foin lalais ne'e Projetu hahú promove foos rai iha restorante no ótel sira iha Dili. Durante vizita primeiru ne'ebé hala'o foin lalais ne'e, ekipa husi Projetu no Diresaun Nasionál Agro-Komérsiu konsege identifika restorante hamutuk 10 ne'ebé iha interese atu uza foos rai husi CAAKUB no ACELDA ba sira nia konsumidór sira iha futuru, enkuantu sira dehan katak sira koko uluk lai foos rai nia kualidade no sabór antes decide atu uza iha sira nia restorante.

Tuir observasaun restorante balu uluk uza ona foos rai hanesan Membramo tanba ne'e sira husu ba ekipa atu fornese Membramo ba sira iha futuru. Sira mós husu variedade espesifiku hanesan IR64 no foos mean, enkuantu restorante seluk hanesan Warung Solo uza tiha ona CAAKUB nia foos desde tinan kotuk.

Sra. Amalia Lemos (45) husi restorante Zenivel ne'ebé tein hahan Indonesia iha nia restorante hatete katak uluk nia uza foos rai husi Maliana. Maibe, nia desidi troka ba foos importa tanba foos rai nia fornesimentu iha merkadu hotu. Agora Sra. Amalia kontente tanba Maliana nia foos faan fali ona, nia hakarak tebes atu uza fali foos husi Maliana iha nia restorante.

Iha parte seluk, Sra. Mize Rosa Soares Mendonsa (35) Jestór husi ÓTEL NOVO TURISMO ne'ebé mós tein hahan ba nia bainaka estranjeiru sira iha nia ótel, hatete katak nu'udar Timor-oan nia intersante tebes atu promove foos rai ba ema estranjeiru sira. Nia gosta tebes atu tein Membramo ba nia bainaka sira tanba Membramo nia sabór gostu tebes, tanba ne'e nia husu CAAKUB atu prepara Membramo ba nia ótel iha futuru. Sra. Mize mós hakarak tebes atu koko variadade seluk hanesan IR64 no foos mean ne'ebé mak agora dadaun faan husi CAAKUB.

Sr. Shinji Hironaka, Japaun nia Péritu ba distribuisaun no faan agrikola, hatete katak hakbesik ba restorante no otél nu'udar estratejia ida husi Projetu no Agro-Komérsiu atu bele hasa'e drastikamente taxa konsumu ba foos rai. Nia esplika katak karik kada loron restorante 10 ne'e bele konsumu foos rai 50kg, iha loron ida sira bele sosa 500kg, iha fulan ida sira konsumu ona tonelada 15 no tinan ida tonelada 180. Tanba ne'e Sr. Hironaka fiar katak maneira ida ne'e sei efetivu ba CAAKUB no ACELDA iha futuru hodi promove foos rai ba setór privadu sira inklui restorante lokál no ótel. Sr. Hironaka mós dehan katak liuhusi aumenta faan foos rai ba setór privadu kada tinan nia iha mehi katak antes Projetu ne'e ramata nia hakakarak tebes hare populasaun sira iha Dili konsume foos rai. Ikus mai nia husu ba CAAKUB no ACELDA atu fórnese foos rai ho kualidade, liu-liu ba variedade sira ne'ebé mak restorante sira husu iha Dili.

Projetu no Agro-komérsiu iha tempu badak sei organiza enkontru ho CAAKUB, ACELDA no restorante nain sira hodi asina kontratu kona-ba negósiu foos rai.

Ekipa Projetu no Agro-Komérsiu vizita restorante sira iha Dili (1)

Ekipa Projetu no Agro-Komérsiu vizita restorante sira iha Dili (2)

Pessoál husi Agro-Komérsiu esplika kona-ba CAAKUB nia foos rai ba restorante nain sira (1)

Pessoál husi Agro-Komérsiu esplika kona-ba CAAKUB nia foos rai ba restorante nain sira (2)

ÓTEL TURISMO

Restorante Pantai Laut ne'ebé foin lalais ne'e vizita husi ekipa