Project News

Iha 2008 Programa Merenda Eskola introduz ona ba eskola Prèmaria tomak iha TL ho ninia objetivu prinsipàl atu fornese ai-han suplementàr ne'ebè iha nutrisaun hodi bele ajuda labarik sira nia konsentrasaun bainhira aprende no aumenta sira nia spirìtu atu tuir aula.

Progama Merenda Eskola utiliza ona foos importa ba tinan barak, maske uluk iha duni esforsu balun atu utiliza foos rai, maibe la konsege realiza tanba menus fornesimentu. Iha parte seluk, CLN nu'udar fornesedòr prinsipàl husi governu hasoru dezafiu atu halo distribuisaun foos rai depoiz sosa husi agrikultòr sira, tanba ne'e foos sira ne'ebé sosa rai deit iha armajen ba tempu naruk ho razaun atu asegura seguransa ai-han.

Atu rezolve situasaun iha leten, Projetu no CLN deside introduz foos rai ba Programa Merenda Eskola hodi nune'e labarik sira bele konsumu foos rai ne'ebè mak prova ona siêntifikamente iha valór nutrisaun aas kompara ho foos importa.

Sr. Jacinto Paijo, Diretór Ezekutivu CLN hatete katak antes governu hatún kuantidade husi foos importa, governu tenke kria situasaun ba populasaun sira atu sosa no gosta sira nia produtu lokál rasik, tanba ne'e introduz foos rai ba iha Programa Merenda Eskola nu'udar esforsu ida atu promove foos rai ba iha públiku. Nia esplika liutan katak antes governu hapara foos importasaun, produsaun lokál tenke bele ona responde ba nesesidade rai laran. Atu alkansa ida ne'e, esforsu integradu husi parte relevante sira importante tebes. Ho liafuan seluk, MAF tenke halo estratejia diak atu aumenta produsaun, agrikultór sira rasik tenke iha bontade atu hasa'e produsaun no CLN tenke kria mekanismu merkadu ne'ebé diak ba distribuisaun no faan foos rai.

Sr. Belchior M.A. Barros Guerra, Diretór Nasionál ba Asaun Sosial Eskola no Sr. Joel Maria Pereira, Asesór ba Vice Ministru Edukasaun, ne'ebé mak responsabiliza ba Progama Merenda Eskola hatete katak Ministériu tenta ona atu hadia'k merenda eskola liuhusi fornese hahan ne'ebé iha kualidade no iha nutrisaun ba labarik sira. Tanba ne'e, sira fó obrigadu ba CLN no Projetu tanba introduz ona foos rai liuhusi Programa Merenda Eskola. Sira hein katak Programa distribuisaun foos rai ne'e sei susténtavel iha futuru liuhusi envolve tan eskola sira iha teritoriu tomak, sira husu ba CLN atu asegura nafatin fornesimentu foos rai. Sira mós husi ba CLN no Projetu atu tau atensaun liutan ba armazenajen no distribuisaun foos rai ne'ebé seguru.

Iha fulan Jullu 2018 Projetu no CLN sei hahú distribui foos rai hamutuk 207 toneladas ba eskola Prémaria 79 iha Dili nu'udar atividade Pilotu.

Sr. Jacinto Paijo, Diretór Ezekutivu CLN.

Sr. Belchior M.A. Barros Guerra, Diretór Nasionál ba Asaun Sosial Eskola.

Sr. Joel Maria Pereira, Asesór ba Vice- Ministru Edukasaun.

Projetu organiza enkontru ho CLN, Ministériu Edukasaun no WFP.

Alunu eskola Prémaria husi 12 Outubru Tasitolu forma ho sira nia bikan atu simu hahan.

Alunu eskola Prémaria husi 12 Outubru Tasitolu gost han sira nia merenda eskola.