Project News

Agora dadaun ACELDA enfrenta hela menus fornesimentu foos rai ba nia konsumidór iha supermerkadu no Loja sira iha Dili no Baucau. Normalmente, atu minimiza kustu transporte, ACELDA sosa deit hare iha área ne'ebé besik hanesan Buluto. Maibe, desde époka dahuluk tinan ne'e iha Buluto hahú iha fulan Juñu, ACELDA laiha dalan seluk no tenke sosa duni hare iha fatin seluk hodi bele fornese nafatin foos rai ba nia konsumidór sira. Iha parte seluk, maski kolleta époka dahuluk ba tinan ne'e hahú ona iha Maliana II, agrikultór sira iha área ne'ebá susar tebes hetan sosa-nain atu hola sira nia produtu. Tanba situasaun iha leten, Projetu fasilita ACELDA no agrikultór sira iha Maliana II hodi ajuda rezolve kestaun sira ne'ebé agora dadaun sira hasoru.

Sr. Higino da Costa Freitas, Prezidente husi ACELDA fó obrigadu ba Projetu tanba liga ninia kompañia ba agrikultór sira iha Maliana II iha momentu ne'ebé ACELDA presiza tebes fornesimentu foos rai. Nia dehan katak maski distansia dook entre Baucau no Maliana no kustu ba transporte ne'ebé aas, nia kontente tanba agrikultór barak iha área ne'ebá hakarak faan sira nia produtu ba ACELDA. Apezar, difikuldade rua ne'ebé mensi ona iha leten, Sr. Higino hatete katak iha futuru nia hakarak tebes atu fila-fali ba Maliana II sosa liutan hare bainhira ACELDA haluan tan negósiu faan foos rai ba restorante balu iha Dili.

Sr. Eugebio dos Santos (52), agrikultór husi suku Memo Maliana II hatete katak kleur ona nia hein sosa-nain atu mai no sosa nia produtu. Tanba ne'e, depoiz rona tiha husi ékipa Projetu katak ACELDA sei mai Maliana II atu sosa hare, Sr. Eugebio kolleta lalais kedan ninia natar no enxe hare iha saka prontu iha nia uma oin atu faan. Desde agrikultór barak iha nia suku mak hakarak faan sira nia produtu, Sr. Eugebio lakohi lakon oportunidade ne'e tanba ne'e nia faan kedan hare 2,390.5kg. Agrikultór sira seluk, Sra. Candida Pereira (58), ne'ebé uluk faan nia hare ba fornesedór seluk, hatete katak nia haksolok tebes atu simu kedan osan depoiz faan hare toneladas rua ba ACELDA. Nia garante katak maski nia faan hare husi uma, hare ne'ebè nia faan hare foun duni. Nia hatete tan katak karik ACELDA fila fali mai iha loron hirak nia laran, nia sei faan tan hare husi nia natar ne'ebé agora dadaun kolleta hela.

Sr. Shinji Hironaka, Japaun nia Péritu ba Distribuisaun no Faan Agrikola hatete katak liuhusi introduz ACELDA ba agrikultór sira iha Maliana II, parte rua ne'e bele hetan benefisiu ba malu, iha liafuan seluk, ACELDA bele rezolve ninia problema kona-ba fornesimentu foos rai, enkuantu agrikultór sira iha Maliana II bele faan sira nia hare hodi hetan osan ituan atu bele hadia'k sira nia moris.

Durante vizita dahuluk iha Maliana II, ACELDA konsege sosa hare mazumenus tonalada 9 no distribui osan ba agrikultór sira iha área ne'ebá hamutuk U$S 3,600.00. Metade husi hare ne'ebé sosa ACELDA sei uza hodi karega nia estok no restu ACELDA sei uza ba ninia atividade promosaun faan foos rai ba restorante sira iha Dili fulan ne'e nia rohan.

ACELDA sosa hare husi agrikultór sira iha Maliana II (1)

ACELDA sosa hare husi Agrikultór sira iha Maliana II (2)

ACELDA nia pessoál selu osan ba agrikultór (1)

ACELDA nia pessoál selu osan ba agrikultór (2)

Agrikultór husi Maliana II haksolok simu kedan osan depoiz faan sira nia hare (1)

Agrikultór husi Maliana II haksolok simu kedan osan depoiz faan sira nia hare (2)