Project News

Ministériu Agrikultura no Peskas (MAP) no Projetu realiza ona seremonia asina faan foos rai ba parte intersada sira iha Embaixada Japaun iha 30 Maiu 2018. Seremonia ne'e marka prezensa husi partisipante hamutuk 90 inklui Sua. Ex. Sr. Estanislau da Silva, Ministru Agrikultura no Peskas, Sua. Ex. Sr. Manuel F. Da Canossa Vong, Ministru Turismu, Sua.Ex.Sr. Hiroshi Minami, Embaixadór Japun no distintu konvidadus husi MAP, Ministériu Komersiu Industria, Embaixada Japaun no JICA.

Kona-ba Preparasaun sistema distribuisaun/faan, Projetu fornese ona apoiu tékniku ba asosiasaun agrikultór husi Maliana, CAAKUB no kompañia privadu ACELDA husi Baucau hodi fasilita sira ba merkadu hodi nune'e promove diak liutan foos rai entre Timor-oan sira. Desde Maiu 2017 Projetu no MAP fó ona apoiu ba CAAKUB hodi faan sira nia foos iha MAP Dili.

Foin lalais ne'e, Projetu no MAP hahú fasilita ona CAAKUB no ACELDA ba merkadu foun hanesan restorante no otél sira iha Dili hodi nune'e sira bele promove no faan sira nia foos iha maneira ne'ebé susténtavel no efetivu liutan. MAF no Projetu konsege identifika restorante nen no otél rua ne'ebé iha interese atu uza foos rai ba sira nia konsumidór sira.

Tanba ne'e, CAAKUB no ACELDA asina ona kontratu faan foos rai ho restorante no otél sira ho nia intensaun atu promove diak liutan foos rai iha nasaun ne'e. Seremonia asina kontratu ne'e asiste rasik husi Governu Timor-Leste.

Maske esforsu ne'e nu'udar etapa inisiu promove foos rai ba merkadu, iha deskursu Sua. Ex. Sr. Estanislau da Silva louva esforsu hamutuk entre MAP no Projetu hodi kria merkadu ba agrikultór sira atu faan foos rai ba otél no restorante sira iha Dili. Iha parte seluk, Sua. Ex. Sr. Manuel F. Da Canossa Vong husu ba restorante no ótel nain sira atu tein foos rai ba turista no vizitante sira hodi nune'e sira bele deskobre produtu lokál ne'ebé uniku husi Timor-Leste.

Sra. Trindade M. de Cepeda, Reprezentante restorante Megamor agradese ba MAF no Projetu tanba introduz ona foos rai husi CAAKUB no ACELDA ba iha nia restorante. Sra. Trindade hatutan katak nia desidi tein foos rai iha nia restorante tanba foos rai iha nutrisaun aas no seguru atu konsumu. Finalmente nia husu ba CAAKUB no ACELDA atu kontinua fornese foos rai ho kualidade ba ninia restorante.

Ambiente husi Seremonia asina kontratu

Reprezentante husi restorante no otél sira ne'ebé partisipa iha Seremonia asina kontratu

Sra. Trindade M.de Cepeda, Reprezentante husi Restorante Megamor.

Sr. Manuel F. Da Canossa Vong no Sr. Estanislau da Silva entrega sertifikadu kona-ba uza foos rai ba resprezentante otél no restorante sira.

Sr. Masafumi Nagaishi entrega sertifikadu uza foos rai ba reprezentante husi otél no restorante sira.

Foto hamutuk partisipante sira iha seremonia asina kontratu