Project News

Maske agrikultór sira iha Buluto demora kuda hare iha époka tinan ne'e, sira hahú ona faan ba ACELDA hare ne'ebé sira produz tinan ne'e. Agrikultór sira haksolok tebes tanba ACELDA mai fali tinan ne'e hodi sosa hare barak liutan husi sira. Tuir observasaun, agrikultór barak mak tula sira nia hare ba uma hodi halo seremonia kultura dúke faan direita iha natar, maske nune'e agrikultór sira garante katak sira faan duni hare ne'ebé foun ba ACELDA.

Sra. Carolina Viegas (62), agrikultór husi Lifau, Laleia rona iha radio katak ACELDA mai fali tinan ne'e atu sosa hare iha Buluto, tanba ne'e depois haketak tiha balun hodi rai ba konsumu uma-laran, nia rai hela kg 1,113 hodi faan ba ACELDA. Sra. Carolina dehan katak tanba kestaun idade nia labele kultiva hotu hektar rua tinan oin. Maibe, tanba ACELDA mai fali sosa hare tinan oin Sra. Carolina iha planu fó aluga hektar ida ba agrikultór seluk ka ninia familia ruma hodi nune'e bele faan nafatin hare hodi hetan osan.

Agrikultór seluk husi Vemasse, Sr. Faustino Cardoso (54) hatete katak nu'udar agrikultór ne'ebé aluga ema nia natar nia tenke fahe rezultadu kolleta ho rai- nain antes faan. Nia hein katak rezultadu tinan oin diak nafatin hanesan agora hodi nune'e nia bele kontinua faan ba ACELDA. Nia sei uza osan husi faan hare hodi selu nia oan sira nia eskola.

Agora ACELDA haluan tan faan foos ba restorante no ótel sira iha Dili, tinan ne'e ACELDA planu atu sosa hare tonelada hamutuk 200 to'o 400 husi Buluto. Tanba ne'e, ACELDA husu ba agrikultór sira iha Buluto atu produz dala rua tinan ida.

Agrikultór sira enxe sira nia hare ba ACELDA nia saka hodi faan (1)

Agrikultór sira enxe sira nia hare ba ACELDA nia saka hodi faan (2)

ACELDA hahú tetu hare

Agrikultór simu osan depois faan nia hare

Agrikultór husi Vemasse Tasi espresa ninia satisfasaun ba média depoiz faan nia hare.