Project News

Normalizasaun Kalendáriu Kultivasaun nu'udar maneira foun ne'ebé propoin husi MAP no Projetu JICA hodi halo modifikasaun ba kalendáriu tuan ne'ebé uluk uza husi agrikultór sira hodi nune'e sira bele komesa halai natar sedu bainhira udan been monu rai.

Uluk agrikultór sira iha Buluto inklui Vemasse laiha esperénsia hala'o époka segundu tanba uza deit irigasaun tradisional ho kapasidade bee ne'ebé menus atu uza ba natar sira iha área ne'ebá. Depois rehabilitasaun irigasaun Buluto bele asegura ona fornesimentu bee ba tinan tomak, signifika katak agrikultór sira iha área ne'ebá bele iha oportunidade atu halo segundu époka. Maibe desde agrikultór sira iha Buluto sei uza hela kalendáriu tuan atu halai natar problema kona-ba menus bee sei eziste hela.

Péritu Japaun kona-ba tékniku kultivasaun Sr. Odashima hatete katak karik agrikultór sira konsidera ho sériu kuda sedu sira bele apar ho oportunidade merkadu tanba bele kolleta sedu no iha oportunidade atu halo segundu époka sein difikuldade ho bee. Iha parte seluk, nia hatete katak agora dadaun Projetu JICA dezenvolve hela oportunidade merkadu ba foos rai tanba ne'e Sr. Odashima husu ba agrikultór sira iha Vemasse atu aproveta tempu hasa'e sira nia produsaun no hetan osan barak liutan husi halai natar.

Sorumutu kona-ba normalizasaun kaléndariu kultivasaun ne'e realiza iha nivél suku no xefi suku sira rasik mak prezide sorumutu ne'e no sira rasik mak sei implementa kuda sedu. Sorumutu dahuluk iha Vemasse, suku Uaigai partisipa husi autoridae lokál, MAP, ékipa Projetu no agrikultór sira ne'ebé sai nu'udar Projetu nia alvu iha área ne'ebá.

Xefi suku Kaikua loke sorumutu

Sr. Odashima aprezenta matéria kona-ba Normalizasaun Kalendáriu Kultivasaun ba agrikultór sira.

agrikultór sira rona ho atensaun matéria kona-ba Normalizasaun Kalendáriu Kultivasaun ne'ebé aprezenta husi ékipa Projetu.