ប្រធានបទ និងព្រឹត្តិការណ៍នានា

នាព្រឹកថ្ងៃទី១០ ខែឧសភា ឆ្នាំ២០១៩ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា និងឯកឧត្តម ហូរីណូអ៊ុជិ ហ៊ីដេហ៊ីសា ឯកអគ្គរដ្ឋទូតវិសាមញ្ញនិងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកការដ្ឋានសាងសង់វិទ្យាស្ថានគរុកោសល្យខេត្តបាត់ដំបង។

ការងារសាងសង់រួមមាន អគារសិក្សា អគាររដ្ឋបាល អគារបន្ទប់ពិសោធន៍វិទ្យាសាស្ត្រនិងសិល្បៈ អគារបណ្ណាល័យ អគារប្រជុំធំ អគារស្នាក់នៅ និងការផ្គត់ផ្គង់សម្ភារៈបរិក្ខារពិសោធន៍ ហើយគ្រោងនឹងបញ្ចប់ជាស្ថាពរក្នុងខែតុលា ឆ្នាំ២០២០។ សូមបញ្ជាក់ថា វិទ្យាស្ថានគរុកោសល្យរាជធានីភ្នំពេញនិងខេត្តបាត់ដំបង សាងសង់ឡើងដោយគម្រោងហិរញ្ញប្បទានឥតសំណងរបស់រដ្ឋាភិបាលជប៉ុន ក្នុងទំហំទឹកប្រាក់ ៣១៧០ លានយ៉េន (ប្រហែល ២៩លាន ដុល្លារអាមេរិក)។

វិទ្យាស្ថានគរុកោសល្យរាជធានីភ្នំពេញនិងខេត្តបាត់ដំបង នឹងមានតួនាទីយ៉ាងសំខាន់ក្នុងការអប់រំគ្រូបង្រៀនកំរិតបរិញ្ញាប័ត្រ(១២+៤) ប្រកបដោយគុណភាពខ្ពស់ ក៏ដូចជាការបណ្តុះបណ្តាលវិក្រឹតការនានានៅប្រទេសកម្ពុជា។ យើងសង្ឃឹមយ៉ាងមុតមាំថា គរុសិស្ស-និស្សិតដែលបានបញ្ចាប់ការសិក្សា នឹងចូលរួមចំណែកយ៉ាងធំធេងដើម្បីលើកកម្ពស់គុណភាពការអប់រំចំណេះទូទៅនាពេលអនាគត។